DUELOS
SANNY
Sanny, o nome artístico tras o que se agocha Sandra Gómez, é unha artista viguesa cun pé nos primeiros anos de Bob Dylan e no Nebraska de Bruce Springsteen, e co outro en artistas indie contemporáneas como Phoebe Bridgers e Sharon Van Etten. Desenvolve o seu particular estilo compositivo e interpretativo en pequenas salas de Santiago e Vigo principalmente.
A comezos do 2019, realiza unha estadía de 3 meses en Preston (Reino Unido) e percorre cada semana os micros abertos dos pubs locais mentres investiga sobre música e sociedade nos EUA. Ademais, este tempo sérvelle para rematar de perfilar os temas que forman parte do seu primeiro EP Loners Downtown (2019), gravado en Estudos Mans. O traballo componse de cinco cancións nas que se explora o tema da soidade e nos que se evidencia claramente a influencia do sonido ‘Americana’. Con este traballo, Sanny participa en escenarios diversos como o Smalltown ou o Sofar Sounds Porto e chega a telonear a Sidonie e Iván Ferreiro nos seus concertos no TerraCeo e no EspazoFest, respectivamente.
Agora comeza unha nova etapa musical coa presentación de dous novos singles ‘25’ e ‘Bird in a Cage’, dous temas gravados o pasado verán en Radar Estudios (Vigo) e producidos por Pablo Iglesias. Con estes dous temas, a artista dá a coñecer a flagrante nova banda que agora a acompaña: Denis Carballás á guitarra, Bruno Costas ao baixo e Anxo Paz á batería. Ademais, o folk máis tradicional das cancións do seu primeiro EP deixa paso agora a melodías máis elaboradas e unha produción máis coidada.
NIÑO LOBO
NIÑO LOBO é o proxecto persoal de Félix Dá Vila Novoa, o compositor vigués lanza o seu primeiro traballo en solitario despois de máis dunha década como letrista e cantante da banda de pop rock Baldosa Amarela.
Con clara intención intimista, case de diario gardado nun caixón, nace “Aquela viaxe do que non regresei”, un álbum formado por doce cancións que nos transportan a diferentes paisaxes e emocións, un disco que narra o cotián desde un punto de vista diferente.
Achegándose no bico dos pés ao folk máis tradicional ou deslizándose en melodías pop ao indie máis actual, NIÑO LOBO descóbrenos en “Aquela viaxe do que non regresei” un lugar, un espello sobrio ao que mirarnos e no que descubrirnos sen fisuras.
MARTIN HUMAN
Martin Human é un power trío formado por Richi no baixo, Marcos na batería e Martín na guitarra e voz.
O seu estilo está influenciado polas músicas norteamericanas como o rock, o grunge e o country.
Teñen un traballo publicado, un EP titulado ‘Anomaly’ totalmente autoproducido e en 2024 levan lanzados dous novos temas propios.
LAW
Law é unha artista galega multidisciplinar: cantante, compositora, modelo, guionista e actriz de dobraxe. Nas súas cancións combina as influencias do R&B, o hip-hop, o reggae, o funk, o soul e mesmo sonoridades tribais. Nelas consegue o equilibrio entre a música urbana desenfadada e as liñas vocais e letras complexas, coidadas e comprometidas.
A través destes elementos xérase un estilo único que chega ás persoas pola súa honestidade, “boas vibras” e paixón. A través da súa obra sinala as desigualdades do mundo á vez que explora e desentraña o seu propio. Tocando en escenarios significativos como o PortAmérica, o Atlantic Fest ou o Festival da Luz, Law conságrase como parte da onda de artistas emerxentes galegos que están a renovar o panorama musical actual.
THE LELLI KELLY’S
The Lelli Kelly’s é unha banda de rock’n’roll galego orixinaria do Morrazo e fundada no ano 2016. A banda é coñecida polas súas enérxicas presentacións en vivo, os seus inesquecibles estribillos e o seu estilo frenético influenciado por bandas como MC5, The Sonics ou The Hives.
Dende 2018 participan en algúns dos festivais máis importantes de Galicia como o Surfing The Lérez, o Antrospinos ou o Millo Verde entre outros.
A banda galega, inicia a xira 2023/2024 o 6 de outubro coa presentación dun novo traballo que inclúe 4 novos videoclips e novas cancións gravadas en Xirín Studios, Vilariño.
GARGANTÚA
Gargantúa, unha banda de tres músicos que levan anos tocando e proceden de diversas bandas e estilos musicais. Todos suman as súas experiencias e cataclismos en Gargantúa.
Publican un primeiro traballo en 2019 “Modelo Uno” onde descargan púas, baquetas e cordas á propósito de pop, indie, rock ou alternativa (ou o que sexa).
Acaban de lanzar en Spotify un EP acústico e os seus vídeos nas sesións que chaman “Dramabot“, que agora mesmo xa se teñen convertido no novo traballo EP da banda.
Con un directo potente e enérxico. Demi Martínez, compositor das cancións, cantante e guitarra da banda, acaba de ser un dos 2 seleccionados galardoados pola Fundación SGAE cunha beca para desenvolver o Laboratorio de Creación Artística da Fundación, baixo a dirección do recoñecido músico produtor de Pablo Nóboa e David Coba (Abraham Boba/León Benavente), que se desenvolverá en marzo 2024.
Veñen de facer Sold out en salas de recoñecido prestixio como o Auriense en Ourense, e tentan achegar o seu show a todos os recunchos de Galicia e España.
SUPERGLÚ
Superglú nace en 2014. Os seus directos caracterízanse polo bo xorne e a
enerxía positiva, cun son propio que bebe de diversas influencias, desde a escena indie-pop nacional e internacional, ata o rock, o country, ou a música tradicional.
Tocan en escenarios como o Festival da Luz, Festival Feito a Man,
Nachiños Fest, FeneRock, Festival Ousa do Mar, Festeiro (Festival Setembro), ou a Sala Son, Sala Mardi Gras, Sala Super8 e o Bâba Bar, e comparten escenario con grupos como Black Eyed Peas, Sidonie, A Ben Querida, Airbag, Celtas Curtos, Arizona Baby, Agoraphobia ou Revólver.
Tras gañar o concurso da plataforma Cultivando Música en 2017, e gravar con el unha primeira maqueta, “Que ben!”, en agosto de 2019 lanzan o seu primeiro EP de estudo, “RevoGlúcion”. Durante 2020 aproveitan o peche para traballar no primeiro LP da banda, “Viaxe”, que viu a luz en setembro de 2021.
A finais de 2022 marchan a Madrid a gravar co produtor Carlos Hernández
Nombela, con quen gravan varios singles que actualmente seguen saíndo á luz.
FROJÁN
Froján é poesía auto-destrutiva en equilibrio coa forza do rock alternativo.
Unha banda nova con gañas de facer sentir aos seus oíntes as historias de vida que albergan as súas cancións. Asentados na cidade de Pontevedra, acaban de
publicar o seu segundo álbum, ‘Reflejos’, producido por Kolibrí Díaz (guitarrista
en Marea) nos ‘Estudios R5’ (Iruña).
Ademais do especial coidado posto nas letras, con influencias da poesía de Kutxi Romero ou Robe Iniesta, conseguen crear o seu propio estilo fusionando detalles barrocos e clásicos co son das bandas referentes do rock nacional.
THE BROKE
The Broke é un grupo de Rock, nacido a mediados de 2016, cun estilo auto definido como “Broke ́n ́Roll”, que bebe do grunge, punk, stoner e hard-rock.
O seu directo é moi enérxico, onde o grupo demostra o seu bo facer e as táboas adquiridas en distintas salas e festivais.
En 2023 a banda editou dous singles e dous singles: Disconnection e Symphony, que se unen ao EP Monster (2020), o novo material de estudo sairá a principios de 2024
LONTRAS
LONTRAS é o proxecto persoal de Juan Arca (guitarra e voz). A través das súas cancións, Juan propón unha viaxe musical na que as letras e a música se complementan para evocar sensacións no ouvinte e espertar a súa imaxinación.
A súa proposta integra a sofisticación harmónica do jazz e a bossa nova e a sensibilidade pop de bandas como Wilco ou Elliott Smith. Completan a formación Sunil López no piano e Zalo Rodríguez na electrónica e samples, que engaden capas ás composicións e aumentan o seu poder evocador.
PRESENTADOR
RAFA VALERO
Rafa Valero é periodista, cofundador de CÍES Podcast e corresponsal de Marca en Vigo.
Comezou nos medios en Radio ECCA e máis tarde desenvolveu boa parte da súa carreira na Cadena Cope, donde traballou durante 22 anos. Posteriormente incorporaríase a Radio Marca, emisora na que permaneceu nove temporadas. Tamén é coautor do libro “Diez años sin el diez”.
XURADO
Alfredo Dourado
Alfredo Dourado, nado en Vigo é o baixista e cantante de A Roda.
A súa formación é de filólogo e músico, atende ás dúas linguaxes, a literaria e a musical. A súa paixón é o baixo eléctrico, instrumento ao que se adica todos estes anos.
En “A Roda” comezou de novo e xa leva toda unha vida, 32 anos nesta formación. Unha bagaxe ininterrompida, que combina coa súa participación en outras, moitas, diversas formacións de diferentes estilos.
Actualmente é xurado na tvg en programas de corte tabernario, e centra a súa actividade na música tradicional/popular.
Karla Lima
Formada en técnica vocal, interpretación, locución e dobraxe. Tamén comercio, marketing e estética.
Aos dezaséis anos formou a súa primeira banda e desde entón traballou na televisión (sendo un dos rostros máis habituáis na TVG).
Vocalista de orquestras con prestixio e incluso abreconcertos de artistas como Chenoa ou David de María.
Tamén compartiu escenario con Beatriz Luengo en Mediaset. A súa voz levouna a escenarios de toda España, Portugal e Suiza.
Pablo Vázquez
Pablo Vázquez é graduado en Comunicación Audiovisual pola Universidade de Vigo e traballa desde 2018 na revista cultural A Movida como redactor e fotógrafo. Durante este tempo acudiu a numerosos concertos e festivais, e realizou máis dun centenar de artigos sobre música e artistas locais.
Foi Xurado Novo en festivais de cine (Novos Cinemas en 2016 e San Sebastián en 2017) e dirixiu tres documentais ata a data: “Cuna de músicos” (2017) seleccionado en Cineuropa, “The Death: el reencuentro” (2020), premiado no OUFF e “O profesor” (2021), gañadora do II Desafío Audiovisual Illas Cíes.
A nivel literario logrou un accésit no Concurso de Relatos Vigo Histórico en 2021 e en 2022 publicou coa Editorial Galaxia o libro “Son da cidade”, no que repasa as últimas dúas décadas da música local.
Tania Rodríguez
Tania Rodríguez é a vocalista e representante da banda viguesa-miñorana de rock e soul THE MIRROR, coa que actualmente se atopan creando o seu segundo disco de temas orixinais e con que conseguiron este ano unha nominación a mellor videoclip con “Arde” nos premios Maketón dos 40 principais de Vigo.
Ademais de The Mirror, Tania ten un dueto de versións co seu compañeiro e compositor Alex Vasconcellos chamado Awen. Tamén ten colaborado con artistas como o gardés Bruce Grinn e Tamara Castro, na electrónica co baionés Vince Stone e na música de raíz co grupo senegalés Mbolo Mooye Doole entre outros.
Máis recentemente ela e mais The Mirror traballaron na creación dun videoclip en stop motion que tivo gran recoñecemento a nivel internacional.
Coa música na súa vida dende os seus comezos en bandas locais con tan só 15 anos, Tania vén cargada de enerxía para escoitar aos novos artistas de The Wild.
Roberto Penas
Roberto Penas, abogado de formación, e escritor de vocación, naceu en Vigo en maio de 1965, nos anos nos que había tempo para todo. Estudiou en “los Maristas”, donde aprendeu os rudimentos do español, que non do galego, iso veu despois e con gran pracer. Finalmente, estudiou Dereito na Facultade de Santiago de Compostela. Durante anos miraba de esguelloo mundo literario e musical, e se aventuraba por él en escaramuzas ocasionais (poesía e contos), concertos, ata que gañou un premio.
O seu primeiro libro de relatos “Sentir la vida. Humanos” está a piques de saír ao mercado, e xa hornea na súa cabeza o segundo.
Asistiu e participou en cursos de comunicación, lenguaxe periodístico, de cine, mediometraxe, CCC CineClubClandestino de Ana Schiuma, e moitas lecturas, audicions, escritos, recortes e tachóns.
Malia que Roberto non ten formación musical regulada e non toca ningún instrumento, di ter bo oído e que gusta de descubrir o talento, ese que fai levantar a cabeza. Ainda que gusta do rock, blues, folk, new age, etc, o seu estilo preferido é o soul (alma). Roberto Penas (de seudónimo Robert White) resume a súa filosofía de vida nunha frase “Eu cando vexo un marciano, paro”.
