Etiqueta: Parque Forestal San Miguel de Oia

Categorías
THE WILD NEWS

O festival The Wild lanza o cartel da súa terceira edición

Celeste Conde | Responsable de Prensa de The Wild

| A concelleira de medio ambiente, Nuria Rodríguez, e a organización de The Wild Fest presentan o cartel do certame e anuncian as novidades principais do evento.
| A completa e esixente carreira de obstáculos The Wild Race, na que aínda hai tempo para inscribirse, e a andaina solidaria mantéñense dentro das actividades previstas neste terceiro ano.
| As 800 entradas xa están á venda na web de The Wild e pódense conseguir dende os 15 euros e ata o 29 de agosto. O domingo a entrada é de balde, aínda que haberá control de aforo.

O festival multidisciplinar The Wild, que terá lugar o 4 e 5 de setembro no Parque Forestal San Miguel de Oia, en Vigo, comeza os preparativos para levar a cabo a súa terceira edición logo do éxito das anteriores. Por iso, a organización do certame xunto coa concelleira de medio ambiente Nuria Rodríguez, presentaron hoxe o cartel no Concello de Vigo.

Neste sentido, Nuria Rodríguez, concelleira de medio ambiente, quixo mostrar o seu apoio, un ano máis, ao festival e aproveitou a ocasión para “animar a todos os cidadáns de Vigo a subir eses días de setembro porque merece a pena, sobre todo ás familias”. Así mesmo, quixo trasladar a súa gratitude por “contar co concello e cos montes de Vigo, xa que é un evento que se realiza en San Miguel de Oia”.

Por suposto, a organización do certame agradeceu o apoio do concello, que leva apostando polo festival dende os seus inicios. De feito, Juan Pablo Pérez, coordinador de The Wild anima “a todos a vir e ao señor alcalde tamén porque estou seguro que nuns anos falarase de The Wild en Nova York e en París”.

Se hai uns días The Wild Fest anunciaba os 7 concertos, dende Los Zigarros, Familia Caamagno e Stoned at Pompeii, ata The Blind Crows, Susana Seivane Trío, Enxeito e Zeltia Irevire, nesta ocasión Juan de Castro, xestor cultural do evento, daba a coñecer algunhas das principais actividades que se desenrolarán.

Así, volve a andaina solidaria. Esta camiñada de 6 km, guiada pola Comunidade de Montes de San Miguel de Oia, levará aos asistentes polos puntos máis emblemáticos do parque como a zona de petróglifos ou os miradoiros, onde se poderá gozar coas mellores vistas da Ría de Vigo e as Illas Cíes.

Ademais, compre destacar que parte dos fondos recadados será doado a Asociación Bicos de Papel, a cal dedica os seus esforzos a acompañar e apoiar aos nenos oncolóxicos do Hospital Álvaro Cunqueiro de Vigo e as súas familias.

Doutra banda, tampouco pode faltar The Wild Race, OCR de 8 quilómetros e máis de 35 obstáculos que incluirá elementos adaptados doutras disciplinas como CrossTraining, Strogman ou PaleoTraining. “O ano pasado non se puido celebrar, pero nesta ocasión intentaremos que sexa mellor, máis completa e para os deportistas un reto maior “explica
de Castro.

Entre as actividades, destaca igualmente o cinema medioambiental, proxectándose durante dúas xornadas unha coidada selección de filmes cun protagonista principal: a natureza. Ademais, tamén haberá oco para os eventos infantís xa que “o público do noso festival son tanto mozos e mozas que van aos concertos ata as últimas horas como as familias”, asegura Juan de Castro.

En definitiva, The Wild é un festival que xunta nun mesmo lugar actividades tan diversas como concertos, faladoiros, xogos para os máis cativos, cinema, sendeirismo ou competicións deportivas baixo unha premisa común: gozar da natureza dende o respecto e a responsabilidade.

Merca a túa entrada

Categorías
THE WILD NEWS

Thee Blind Crows, Stoned at Pompeii e Susana Seivane Trío, primeiros concertos confirmados en The Wild Fest

Celeste Conde | Responsable de Prensa de The Wild

The Wild, festival multidisciplinar que terá lugar o 4 e 5 de setembro no Parque Forestal San Miguel de Oia, confirma os primeiros artistas que se subirán aos escenarios na súa nova edición: o trío pontevedrés Thee Blind Crows, os vigueses Stoned at Pompeii e Susana Seivane Trío.

Nesta terceira edición, a música do país terá unha gran presenza. Así, poderase gozar do folk, pero tamén do blues punk da man de Thee Blind Crows e do rock con selo vigués de Stoned at Pompeii.

“O cartel desta terceira edición é moi potente e aínda quedan máis grupos que confirmaremos en breves, pero podemos adiantar que tamén haberá espazo para artistas nacionais de gran envergadura”, afirma Juan de Castro, xestor cultural de The Wild. Ademais, engade que “este ano quixemos apostar mais que nunca pola música, un dos grandes prexudicados da pandemia”.

Deste xeito, The Wild Fest fai unha aposta por distintos estilos musicais e por facer un percorrido pola escena máis actual do panorama galego e nacional para ofrecer unha noite chea de música e máis unha sesión vermú.

A parte máis musical do The Wild arrinca o día 4 ao mediodía coa actuación de Susana Seivane Trío, a formación dunha das artistas de maior percorrido e traxectoria e que máis revitalizou o folk galego. Thee Blind Crows, pola súa conta, tocarán ese mesmo día pola tarde para encher o parque forestal coa enerxía e a forza do seu guitarreo blues punk. Pola noite será a quenda de Stoned at Pompeii cun directo abraiante cun estilo de carácter stoner rock que lles valeu o galardón de “Mellor Directo” nos premios Maketón Los 40 no 2020.

Stoned at Pompeii, Susana Seivane Trío e Thee Blind Crows primeiras confirmacións de The Wild 2021.

Por suposto, o festival, un dos poucos que conseguiu saír adiante o ano pasado, continuará cuns estritos protocolos de seguridade co obxectivo de crear un espazo seguro. Máscaras, aforo limitado ou sentidos únicos de circulación son algunhas das medidas previstas para o certame, que completará a súa programación con actividades para toda a familia, desde unha andaina solidaria ata The Wild Race, unha apaixonante carreira de obstáculos, así coma faladoiros ou todo tipo de eventos infantís.

Máis información e venda de entradas proximamente na web thewildfest.com

Categorías
THE WILD NEWS

Aberta a inscrición a The Wild Race

Celeste Conde | Responsable de Prensa de The Wild

O festival multidisciplinar The Wild abre as inscricións de The Wild Race, unha carreira OCR que terá lugar o 5 de setembro e que promete grandes doses de adrenalina e desafío nun entorno natural como é o Parque Forestal de San Miguel de Oia.

Ademais, cun percorrido de 8 quilómetros e máis de 35 obstáculos, incluiranse elementos adaptados doutras disciplinas como CrossTraining, PaleoTraining ou Strogman. Sen dúbida, unha actividade na natureza que estará chea de emoción, aventura e moita diversión.

Miriam Gesteiro, coordinadora de The Wild Race afirma que “a carreira combina a perfección natureza e exercicio físico. Por iso será unha gran experiencia para todos os participantes, que deberán loitar para superar os obstáculos e a si mesmos a través dunha boa preparación mental, unha correcta xestión da presión e un adecuado control da enerxía”.

Deste xeito, The Wild Race é unha carreira deportiva, lúdica e integradora que supón un verdadeiro reto para os atletas, que deberán aproveitar os recursos que lles proporciona o medio natural ao mesmo tempo que crean sinerxías para superar con éxito cada obstáculo.

Compre destacar que, por mor do coronavirus, levarase a cabo un rigoroso protocolo co fin de garantir a seguridade e o benestar tanto dos participantes coma do público e o staff e estará en consonancia coa lexislación vixente e as recomendacións das autoridades locais e autonómicas. Así, entre outros, haberá un único sentido de circulación, as zonas estarán diferenciadas e delimitadas e será obrigatorio levar máscara antes de comezar a proba.

Por suposto, esta actividade enmárcase dentro do festival, que se celebrará do 4 e 5 de setembro no merendeiro de San Miguel de Oia e no que se poderá gozar de concertos, xogos para os máis cativos, faladoiros ou diversos eventos coma a andaina solidaria.

AS MODALIDADES DE PARTICIPACIÓN EN THE WILD RACE

En The Wild Race poderase competir en dúas modalidades diferenciadas: Wolf e Raven:
– A modalidade Wolf é unha carreira por equipos de catro persoas, polo que a cooperación, a táctica e o traballo de todos os integrantes será fundamental para chegar con éxito á meta.
– A modalidade Raven é unha carreira individual. Sen embargo, os participantes poderán decidirse pola categoría Élite, onde non poderán recibir axuda doutros participantes para superar as probas, ou Popular, que si permite recibir axuda externa.

OS PREZOS E A INSCRICIÓN

Todos os participantes que teñan 16 anos ou máis pódense apuntar á carreira a través da web de The Wild, onde tamén están as bases completas, ou na páxina Champion Chip Norte.
Doutra banda, o prazo de inscrición remata o 29 de agosto e os prezos variarán entre os 15 e os 30 euros en función da data de inscrición.
Neste sentido, tamén existe a posibilidade de adquirir o Bono The Wild por 10 euros máis que inclúe a participación na carreira e a entrada ao festival, que terá lugar o 4 e 5 de setembro no merendeiro de San Miguel de Oia.

Consulta aquí máis información e bases do desafío.

Categorías
THE WILD NEWS

Alumnos do CEIP Ría de Vigo crean o Bosque da Lingua: Xela Arias

Celeste Conde | Responsable de Prensa The Wild

O festival multidisciplinar The Wild leva a cabo un programa de concienciación medioambiental cos alumnos de 6º de primaria do CEIP Ría de Vigo. Un evento no que a dirección do centro de ensino facilitou e apoiou xunto coa Comunidade de Montes.

Así, este venres 14 de maio, o alumnado de 6º de primaria do colexio, puido gozar dunha camiñada polos sendeiros de San Miguel de Oia, coñecer o conxunto etnográfico de Os Muíños de Gontade e crear o Bosque da Lingua: Xela Arias, composto por un total de 12 carballos, un
por cada aula do centro, conmemorando deste xeito o Día das Letras Galegas.

Neste sentido, os rapaces e rapazas puideron aprender e executar todo o proceso de plantación, así coma coñecer as características botánicas da especie. Posteriormente, os diferentes cursos de primaria da escola irán visitar a zona e deixarán os seus poemas e escritos na árbore correspondente ao seu curso.

Miriam Gesteiro, coordinadora do proxecto, afirma que esta actividade “non só é saudable, senón tamén divertida e educativa para os nenos, conseguindo que coñezan mellor a súa contorna, que descubran a importancia de respectar o medio ambiente. Ao mesmo tempo, conmemoran dun xeito diferente o Día das Letras Galegas e a escritora e poeta Xela Arias, tan vencellada a cidade de Vigo e con ligazóns na nosa zona ”.